Gipuzkoako Foru Aldundiko Kultura Sailak sustatutako eta Kultur Factoryrekin elkarlanean antolatutako jaialdiaren bederatzigarren edizioak, beste behin ere, ikus-entzunezko sorkuntza eta publikoaren arteko lotura indartzea du helburu. Goizane Álvarez Kultura diputatuaren hitzetan, “osteguneko programazioak Crossoverren espiritua islatzen du: kalitatezko estreinaldiak eta sortzaileekin solasaldiak uztartzea, ikus-entzunezkoak herritarrengana hurbiltzeko”.

Yo siempre a veces telesaila izango da lehen proposamena. Javier Calvo eta Javier Ambrossi ekoizleen lan berria da, eta apirilaren 23an iritsiko da plataformara. Fikzioak emakume garaikidearen erretratu zuzena eskaintzen du, umorea, kaosa eta samurtasuna uztartuz.

Sortzaileek, Marta Bassols eta Marta Lozak, Ana Boga aktorearekin batera aurkeztuko dute proiektua. Bartzelona eta Berlin artean grabatua, ustekabeko ama bakar baten egunerokoan murgiltzen gaitu, lanaren, zaintzaren eta emozioen artean oreka bilatzen saiatzen dena.

‘Por cien millones’: bahiketa baten atzean dagoena

Bigarren estreinaldia Por cien millones izango da, hiru ataleko telesaila. Aurkezpenean parte hartuko dute Julia de Castro aktoreak, Nacho G. Velilla zuzendariak eta Cristina Merino ekoizle exekutiboak.

Serieak Enrique Castro Quini futbolariaren 1981eko bahiketa ezaguna abiapuntu hartzen du, baina batez ere hiru langaberen istorioa kontatzen du: egoera ekonomiko larriak bultzatuta, erabaki muturrekoak hartzen dituzten hiru gizon, errealitatearen eta fikzioaren arteko muga lausotuz.

Ikusle Gonbidatua: Sara Azurza

Emanaldiez gain, osteguneko egitaraua Ikusle Gonbidatua saioarekin osatuko da. Oraingoan, Sara Azurza abeslari donostiarrak parte hartuko du, eta telesailen fenomenoaz hausnartuko du bere ikuspegi pertsonaletik.

Jaialdiari buruzko informazio guztia, baita sarrerak eta gonbidapenak ere, eskuragarri daude webgunean: www.crossoverseriesfestival.com.