2014-11-11

Arabako Fournier Karta Museoak Antoni Tàpies (Bartzelona, 1923 – 2012) katalanaren album bat aurkezten du, Cartes per a la Teresa, hain zuzen ere. Egilea XX. mende bukaerako plastikan eraginik handiena izan duen artista garaikideetako bat da. (2014ko azaroaren 14ra arte).

Lan osoa 64 litografiaz eta collagez osaturiko karpeta da eta 1974. urtean Parisko Maeght etxeak inprimatu zuen. 2003. urteaz geroztik museoaren bildumako zatia da.

 

Antoni Tàpiesek maitasunaz eta patuaz gogoeta egiten du lan honetan modu poetiko eta sinbolikoan, hain berezkoa duen mintzaira plastikoaren bitartez. ‘Karta’ hitzaren adiera bikoitza erabiltzen du: eskutitza eta jokoan aritzekoa; izan ere, bere emaztearentzako zenbait ohar eta Gasteizko Fournier enpresak argitaratutako kartak nahasten ditu orri hauetan.

 

Egilearen obra grafikoak, eta bereziki Cartes per a la Teresa delakoak, hainbat materialez eta objektuz eginiko collageak eta testura ugari ditu. Osagai horiek Tàpiesen kaligrafia berezi eta bere ohiko irudi batzuekin batera agertzen dira.

 

Album batean bildu diren orri hauek bat egiten dute Tàpiesek beste egile batzuekin elkarlanean egindako “artista liburu” ugariekin: “idatzita dutena garrantzizkoa izateaz gain, beren itxura materialaren bidez esaten dutena ere oinarrizkoa da”.

 

Cartes per a la Teresa lanak egileak zeukan gurari honekin lotura duela jotzen da: “objektu magikoak sortzea, ikusleari zenbait ideia komunikatu eta harengan zenbait efektu sorraraziko dituzten benetako talismanak, alegia”.