Ehunka proposamenen artetik hautatutako konpainiek jaialdiaren izaera anitza islatzen dute. Guztira, 18 euskal konpainiak parte hartuko dute, tokiko sorkuntzarekiko konpromisoa berretsiz. Horiez gain, Estatuko hainbat autonomia erkidegotatik etorritako 21 konpainiak —besteak beste Andaluzia, Katalunia, Galizia edo Valentziatik— kale arte eszenikoen panoramaren erakusgarri zabala ekarriko dute. Nazioarteko presentzia ere nabarmena izango da, Italiatik, Frantziatik edo Argentinatik etorritako 6 konpainiarekin.

Aurtengo edizioaren ardatz nagusietako bat estreinaldien indarra izango da: 25 estreinaldi oso eta Euskadin lehen aldiz ikusiko diren beste 16 lan izango dira. Horrela, Leioa berriro ere plataforma bihurtuko da publikoarekin konektatu nahi duten proiektu eszeniko berrientzat, antzerkia, dantza eta zirku garaikidea besteak beste.

Programazioak askotariko formatuak hartuko ditu: pieza estatikoak zein ibiltariak, dantza garaikidea, zuzeneko musika eta lengoaia berriak jorratzen dituzten proposamen hibridoak. Jaialdiak, halaber, ibilbide sendoko konpainiak eta proiektu emergenteak elkartuko ditu.

Lau egunez, Leioako erdigunea kulturaren topagune bihurtuko da, publikoari esperientzia ireki, hurbil eta parte-hartzailea eskainiz. Umore Azokak, gainera, sektore profesionalerako erreferentziazko gunea izaten jarraitzen du, konpainien, programatzaileen eta kultura-eragileen arteko harremanak bultzatuz.

Bi hamarkadatik gorako ibilbidearekin, Leioak berriro berresten du kultura eskuragarriaren aldeko apustua, espazio publikoa dinamizatuz eta artistak eta herritarrak elkarrengana hurbilduz. Edizio honek sormen, berrikuntza eta ustekabez beteriko egitaraua eskainiko du.

2026ko edizioko irudia Ángel Ligero diseinatzaile eta margolariak sortu du; proposamen bisual minimalista eta zuzena da, Umore Azokaren nortasuna modu bereizgarrian laburbiltzen duena.