Gipuzkoako Aldundiak 88.000 euro bideratuko ditu Meta! mikromezenazgo (crowfunding) programaren bosgarren ediziora, aurreko edizioetako aurrekontua (70.000 euro) gehituz. Gainera, Piztu Kultura planaren bidez bere edukiak zabaltzeko eta gizarteratzeko konpromisoa hartu du. Aurkezten diren proposamenen artetik, 15 aukeratuko dituzte, guztiak Gipuzkoako sortzaile eta kolektiboek bultzatuak eta bertan kokatuak. “Ziur nago berriro ere agerian geratuko dela gipuzkoarrok kulturari ematen diogun babesa. Herritarrek badakite kulturak zer nolako garrantzia duen jarrera kritikoa garatzeko, gure bizi kalitateari eusteko eta etorkizun hobe bat eraikitzeko”, azaldu du Kultura diputatu Harkaitz Millanek.

Proiektu bakoitzari 4.780 euro emango dizkio gehienez Aldundiak, aurrekontua agortu arte. Normalean, herritarren ekarpenek erakundearen ekarpena bikoiztea ahalbidetzen dute, aurreikusitako finantzaketa gainditu arte. Proiektuak aurkezteko epea ekainaren 5ean hasi eta uztailaren 16an bukatuko da. Aukeratutako egitasmoak uztailaren 28an jakinaraziko dituzte. Tramitazioa Meta!-ren edo Goteo fundazioaren webgunearen bidez egingo da.