Loraldia Festibalak euskal kulturaren transmisioa eta berrikuntza sustatzea du helburu. Aurtengo edizioan, euskarazko kulturaren balioak izango ditu ardatz: berrikuntza artistikoa, gizartearen integrazioa eta ingurumenarekiko errespetua. Hala, publiko anitza erakarri nahi du, euskalduna zein ez-euskalduna, kultura garaikidearen esparruan erreferente bihurtu den programazioaren bidez.

‘Trikua esnatu da’ leloak  Bernardo Atxagak euskara deskribatzeko sortutako metaforan du jatorria: izaki txiki eta zaurgarria, baina historia luzea duena eta bere arantzekin babestua. Gainera, udaberrian behin esnatzen da trikua, loaldi luze baten ondoren.

Loraldia Festibalak programazio zabala eskainiko du, hainbat diziplina artistikorekin. Jarduera askok antzerkia, musika, zinema, literatura, bertsolaritza, dantza eta arte garaikidearen arteko fusioa sustatzen dute.