Bizipoza Elkarteak izaera bereziko haur eta familiekin egiten du lan, 34 elkarte, helburu batekin: euskaraz eta sorkuntzatik,  izaera bereziko haur eta familiekin elkartasuna bizipozez lantzea.

Lan hori egin ahal izateko, boluntario-sarea antolatzen dihardute, dela lan boluntarioa eginez dela ekarpen ekonomikoa eskainiz. Erakunde, talde zein norbanakoek elkartasunaren eta gizartegintzaren aldeko Bizipoza Elkartearen sarean parte hartu dezaten dei egin nahi diete.

Goiburu nagusi bat du kanpaina honek: Keinu bakoitza, opari bikoitza.

Gabon-postal bereziak sortu zituzten abenduaren 7an, Durangoko Azokan. Goizean zehar, Durangoko Ibaizabal ikastolan sormen-tailerra burutu zuten: Bizipoza Elkartea osatzen duten elkarteetako 40 haurrek, eta arratsaldean aurkeztu genituen Saguganbara gunean.

Hainbat boluntariok ere hartu zuten parte sormen-tailerrean; tartean, Imanol Agirretxe Realeko jokalari ohiak, Leire Bilbao idazleak, Arritxu Iribar kazetariak, Ainara Azpiazu ilustratzaileak, Abel Barriola pilotariak, Ramon Agirre, Porrotx, Tiritatxo, Martinbertso, Anabel Arraiza eta Miren Gojenola aktoreek, eta Asisko Urmeneta marrazkilariak.

Datozen asteotan ohiko posta bidez zein Internetez egingo diete gonbita euskal herritarrei Bizipoza Elkarteko boluntario egin daitezen. Baita euren ingurukoak boluntario izatera animatu ditzaten ere, gabon-postalak idatziz.