Getxoko banda Madrilera joan zen musika munduan bidea egiteko asmoz. Bost disko plazaratu eta gero, 2011n 'Radiaciones luminosas' argitaratu zuen, bere lehen album autoeditatua, rock freskoz betetakoa. Bertan, Zodiacs taldeak frogatu du bila zebilena aurkitu duela.
Zodiacs-ek gauza asko bizi izan du 12 urtetan. Lehendabizi bi disko argitaratu zituen Animal Records-ekin, R&R, pop doinuak, punk indarra eta new wave oihartzunak osagai nagusi zituzten lan fresko bezain adoretsuak. Gero Warner multinazionalak Dro logotipoa jarri zien hurrengo hiru albumei. Horrez gain, Fito&Fitipaldisekin egindako birak eta zenbait pelikulatan txertatutako musika ere ageri dira azkenik autoekoizpena eta independentzia ekarri dituen ibilbide intentsuan.
Getxoko laukoteak seigarren diskoa kaleratu du, ‘Radiaciones luminosas’, “psikodelikoena, introspektiboena eta basatiena”, Troggs, War, The Free Design eta Creation bezalako erreferenteak gogoan erditutakoa. Paco Locok ekoitzitako sorrmen-askatasun eta ausardia ariketa honetan, taldeak bere burua berrasmatu du teklatu-geruzak, eta Stones eta Lone Star-enganako begi-keinuak oinarri hartuta. Iheslariei, dimititutako deabruei, odolarekiko zaletasunari eta gainditutako estresari buruzko istorioek ere lekua dute lan honetan, garajetik, beat-etik eta yeye mundutik ere asko edan duen lana, Doors-engandik hurbilago dabilena Elvis Costellorengandik baino.
Segur aski asko interesatuko zaizu...