Tennesseeko kantari, gitarrista eta kantugilea aspaldiko soinuen zalea da, baina bere lanak revival hutsa edota berrikusketa edo estilo ariketa xumearen izaera gainditzen du. Nahiz eta ekoizpen lanetan, rock and rollaren urrezko aroaren lekuko izan zen Roland Janes laurogeitaka urteko Sun Records taldeko gitarra-jotzaile ohia eta Sam Phillips Recording Service-ko ekoizle eta ingeniariaren babespean jardun duen. Elkarrekin, disko bikaina landu dute, Memphis circa 3AM, benetakotasuna eta ezinegona dariona, hautsik gabekoa, iraganerantz bultzatzen gaituen arren.

John Paul Keith erabat eroso ageri da hirugarren iraupen luzeko honetan, rock and roll klasikoa, countrya, rockabillya, pop soinuak eta balada erakargarriak joz eta kantatuz. Vintage kutsuko bitxi ederra, musika herrikoiaren sehaska berean sortua, Viceroys alt-countryko taldean jo eta Chuck Berry eta BB King bezalako R&R eta blueseko klasikoekiko zaletasuna behin ere ezkutatu ez duen artistaren eskutik.