Arteak mugarik ez duela erakutsi nahi izan dute Oreka Tx musika taldeak, Kukai dantza konpainiak eta Amaren Alabak talde bokalak ‘Hostoak’ ikuskizunean. Edo izatekotan, horiek ere gainditzeko daudela behintzat. Hain zuzen ere, hiru genero horiek uztartu dituzte eta sailkaezin bezain ederra den muntaian.

“Diziplina artistiko desberdinak nahasten dituen ikuskizuna da”, laburbildu du Igor Otxoa Oreka Tx taldeko txalapartariak. “Haien mugak hausten saiatu gara, hirurak ondo uztartuz”.

Hiru konpainiek gustuko dute tradizioan oinarritzea artearentzat bide berriak jorratzeko, “iragana ezagutu gabe ez baitago aurrerago egiterik”, Otxoak dioenez. Ildo horretan, ‘Hostoak’-ek eszenografia ikusgarri eta berritzailea erabiltzen du, sustraiak euskal dantza eta musikan dituen ikuskizun baten zerbitzura.