Gernikako taldeak inork ez bezala uztartu ditu pop melodiak, behin ere kamusten ez den espiritu erreibindikatzailea eta euskaraz landutako testuen bokazio poetikoa. Formula arrakastatsu hau sei diskotan aplikatu du. Azkena, ‘Ortzimugak begietan’.

Erronkak gustuko ditu Ken Zazpi-k. Ez zen konformatu bere lehen diskoek (‘Atzo da bihar’ eta ‘Bidean’) izan zuten arrakastarekin eta bide berriak jorratu zituen ‘Gelditu denbora’ (Gork Diskak, 2005) akustikoarekin. Bi urte geroago Los Angelesera joan zen Rafa Sardinaren zuzendaritzapean ‘Argiak’ (Oihuka) grabatzera; gero zuzenekoa grabatu zuen eta bost urte beranduago produktore berarengana itzuli zen ‘Ortzemugak begietan’ biribiltzera.

Lan horretan nabariak dira taldeak bereizgarri izan dituen bertuteak: sustrai musikalekiko fideltasuna, konpromisoa eta etengabe eboluzionatzeko nahia. Taldeak urtebete pasa eman du soinu garden baina aldi berean indartsuz hornitutako lana aurkezten, eszenografia ikusgarriz apaindutako bira batean.

Laster, ordea, oraindik argitu ez duen erronkari ekingo dio. “2012ko Azokarako disko guztiz berezi bat kaleratuko dugu, Ken Zazpirentzat salto kualitatibo bat suposatuko duena maila guztietan”,  aurreratu du Eñaut Elorrieta abeslariak. Horren zain geratzen gara.