Testua: Igor Cubillo |
Lucinda Williamsenak ez dira kantu errazak; gehienetan ez dute eragiten dantzan jartzeko moduko astindurik, eta ez daukate kantatzeko moduko errepika errazik. Louisianako songwriterraren errepertorioa arretaz entzuteko sortua da, atzaparkadak eta imurtxiak gustura onartzeko moduan, ariman eta bihotzean dituen zauriak nola ireki eta erakusten dituen adi eta beldurrez begiztatzeko moduan.
Itxaronaldia, abandonua eta malenkonia gisako gorabeherek eragindako sentimendua, nolabaiteko bokazio poetikoa eta gatazkan bizi diren pertsonen oinazea, han-hemenka ageri dira, kritikarien eta gainerako musikarien begirunea lortu duen kantautore honen legatuan. 1979an argitaratu zuen 'Ramblin', bluesari eta folkari lotutako lehen lana, eta geroztik, country alternatiboaren apostolu bihurtu duten beste hamar album kaleratu ditu. Artistetan artistena oso izendapena murritza da musika amerikarraren sustraia inork baino hobetu zukutu duen kantari, gitarrajole eta musikagile erraldoi honen kasuan.