Musika genero guztiek dituzte erreferentziazko artistak. Normalean, aitzindari izateagatik, jardunaren kalitateagatik edota berritasunagatik iristen da status horretara. Rock eta metal industrialaz pentsatzen dugunean, normalean eredugarritzat jotzen diren banda gutxi batzuk aipatzen dira, eta jende gehienak 1989an Los Angelesen eratutako Fear Factory taldea ere sartu ohi du multzo horretan, teknologiak gizartean eragindako kalteak kantutegian sartzeko ahaleginagatik.
Talde honen jarraitzaileek Burton C. Bell kantariaren eta Dino Cazares gitarrajolearen arteko dibortzio artistikoa deitoratu zuten 2002an. Cazares Asesino eta Divine Heresy proiektuetan murgildu zen. Bien arteko berradiskidetzea 2009an gertatu zen, eta bien artean bultzatu dute 'The industrialist', izaera industrialeko metal-zartako amorratua, hardcore-oinarriak, oihuak eta gitarra nekaezinak uztartzen dituena. The Epic Industrialist Tour biraren barruak dakarkigute, Devin Townsend eta Dunderbeist-en partaidetzaz.