Galdera. Zer ikusi zenuen obra honen testuan, eszenatokira eramateko erabakia hartzeko? 

Erantzuna. Mamet balio ziurra da, iragan mendearen bukaerako eta honen hasierako antzerki-idazlerik garrantzitsuenetarikoa. Idazle gisa, bere pertsonaietako bat antzeztu nahi izan dut beti, politikoki batere egokiak ez direlako eta teknikari dagokionez ezaugarri bereziak dituztelako. Obra berrirakurtzen ari nintzela, gauza garrantzitsu batzuei buruz ari zela ikusi nuen, adibidez aurreiritziak, arrazakeria eta sistema judizial amerikarrarekiko kritika basati eta beharrezkoa; baina kritika hori espainiar sistemari ere aplika dakioke, hemen ere ez gaudelako han baino hobeto. Idazkuntzari dagokionez saio bikaina iruditu zitzaidan eta beraz merezi zuela hura aurrera eramatea.

G. Eta berdin funtzionatzen du Estatu Batuetan eta hemen?

E. Erabat berdin. Antzokitik irtetean, ikusleek eztabaida biziak izaten dituzte eta eserlekuan deseroso sumatzen zaie modu desegokian eta oso beharrezkoan esaten diren zenbait gauza entzuten dituztenean. Gaur egun politikoki egokiaren kultura oso sustraiturik dago eta Mametek hori kritikatzen du. Gaur egungo antzerkian, beltza ezin da gaiztoa izan arrazista zarelako, emakumea ere ez matxista zarelako eta gaya ere ez orduan homofoboa zarelako. Eta azkenean oso erraz aurreikusten da obretan gertatzen den guztia. Ildo horretan, bestela esatera ausartzen ez garen gauza asko esaten ditu obra honek, eztabaidarako bide aberasgarriak zabalduz.

G.  Zelan sentitzen zara Jack Lawsonen larruan?

E. Gizontxo bitxia da. Etikarik gabeko marrazo-abokatua da eta bost axola zaio defenditu behar duena erruduna den ala ez; ondo kobratzea besterik ez zaio interesatzen. Horrelako paper bat antzeztea oso gustagarria da.

G.  Eta zeintzuk dira pertsonaiaren zailtasun nagusiak?

E. Testu luzea da eta elkarrizketak ulergaitzak dira batzutan. Lehenengo erronka pertsonaia ondo ulertzea zen, zer esaten zuen eta zergatik esaten zuen.

G. Eta ikusleentzat ere zaila izaten da ulertzea?

E. Arazorik gabe ulertzen da. Ikuskizun komertziala da, hitzaren zentzu onean. Nire ustez antzerkian entretenimendu hutsa baino zerbait gehiago eskatu behar zaigu, edo hori da behintzat niri interesatzen zaidan antzerkia; eta obra honek ugari du horretatik.