Lyidia Ohioko herri batean hazi zen, musika denborapasa eta amorrurako ihesbide zuela. Ahots bikainaz hornitutako hogeitaka urteko abeslaria da gaur egun. Folk rock, alt country eta rockabilly zipriztinak ageri dira jada bi album argitaratu duen eta entzun beharko zenukeen songwriter-aren lanetan.

Hogeitaka urte izanik, estatubatuar abeslari, gitarrista eta konpositoreak indarra barra-barra du. Bere diskoak entzuten dituzunean, alt country-a rockabillyarekin nahasten dela, folka banjo eta biolin moldaketetan lehertzen dela, 'pedal-steel'-ak sakontasuna gehitzen duela eta gitarren elektrizitateak multzoari eusten diola ikusten duzu. Baina Lydiaren ahotsa nabarmentzen da bereziki, musika mota bakoitzak behar duen tinbrearekin, laztan baten gozotasunarekin eta crochet baten potentziarekin.

 

Horrela indarra bereganatzen dute bide erratuei, harrotasunari, bikote-liskarrei eta botilarekiko amodioei buruzko kantuek. Jarioa eta lotsagabekeria sobera ditu lehen entzunaldian harrapatzen zaituen artistak; bere adinari ez dagozkion patxada eta background-a nabaritzen zaizkio. Zerikusia izango du familiaren etxaldean igarotako haurtzaroak eta aitaren tabernak emandako arratsaldeek. Bere bi albumetan sumatzen da Lydiaren handitasuna. Gainerakoa, bila ezazu bere zuzeneko gomendagarrian.