Sentiberatasun handiko konpositore eta interpretatzailea,Pello Ramirez (Ordizia, 1966) akordeoi eta biolontxelo jotzailearen musikak zentzumenak laztantzen ditu pasarte bakoitzean. Haren konposizioak zuzenean bihotzera heltzen zaizkigu modu naturalean, musikariak naturari dion miresmenaren eraginez akaso.

“Ni naturarekin behar dut harremana. Niretzat da nirebizitzan beharrezkoa den aspektua. Ez naiz hirikoa eta saiatzen naiz musikan aspektu hori islatzen”, dio Ramirezek.

Emanaldi honetan bakarka argitaratu dituen bi diskoak (‘Haize oihalak’ eta ‘Eskuz lurrari’, 2006an eta 2010ean hurrenez hurren Elkar-ekin argitaratuak) errepasatuko ditu, baita enkarguz idatzi dituen lanak ere, horien artean zenbait soinu-banda direla. Xabier Zeberio (arrobita etanykelharpa) eta Fredi Pelaez (piano eta teklatuak) izango ditu lagun; musikarihoriekin hainbat proiektutan lan egin du, tartean Alos Quartet musika instrumentaleko talde bikaina.

Pello Ramirezek musika tradizionalaren eta herrikoiaren arteko zubia eratu du. Akordeoiak (txikitatik ikasi zuen tresna) eman zion ikuspuntu herrikoia eta biolontxeloak, berriz, klasikoa.

Bere ibilbidean zehar hainbat kantarirekin ere lan egin du,(Benito Lertxundi, Maddi Oihenart eta Mikel Markez, besteak beste) eta musikari buruzko bestelako ikuspuntua eman dio esperientzia horrek. “Musikaren funtsa ezda instrumentua. Barrutik kantatu egin behar da eta kantariekin aritzea lezio handia da, benetako altxorra”, dio musikariak. Hortik bere musikaren jatorria:“urte asko daramatzat musikan eta hain barneratua dut musika, nire kantatzeko modua instrumentua dela”.