Testua: Jonan Hernández |
Oso gutxitan gertatzen da banda baten izena taldearen espirituarekin bat ez etortzea. Grises taldearen musika entzutean, era askotako kolore musikalak atzematen dira, baina ez izenak iradokitzen duena. Aitzitik, banda gipuzkoarrak eskaintzen digun koktel dantzagarria funkera eta soinu elektronikoetara hurbiltzen da une jakin batzuetan.
‘Elhombre bolígrafo' (Origami, 2011) da Grises taldearen lehen diskoa, eta orain arteko bakarra. Sei kantuz osatutako EP honetan, bandaren asmoak argi daude hasiera-hasieratik. “Guk beti esaten dugu indie rock egiten dugula jendeak musika sailkatzeko joera duelako, baina egia esanda ez dugu estilo zehatz bat”,azaldu du Amancay Gaztañaga kantariak. Bere neba Eñaut (gitarra eta ahotsa), Alejandro Orbegozo (sintetizagailuak), Raul Olaizola (baxua) eta Antonio Diniz (bateria) dira taldea osatzen duten gainerako kideak.
Amancayren hitzetan, Grises taldearen soinua taldekide guztien “eromen sortzailearen”emaitza da. Eromen hori argi eta energia bihurtzen da bere musika entzuten hasten denean.