Charlie Musselwhite bluesaren legenda izatea lortu du, erreferente eta aitzindari beltzak nagusi diren esparru batean musikari zuri gutxik lortu dutena. 1967an hasi zuen generoaren gailurrera eramango zuen bidea (eta Etxe Zurian ere jotzeko bidea eman diona). Urte hartan kaleratu zuen estreinakoa diskoa, 'Stand Back', Southside Band taldearen buru zela.

Ondoren, harmonika-jotzaile estatubatuarrak beste 30 album grabatu ditu. Lan horietan nabaria da jazz, gospel, tex mex, country, boogie eta rhytm & blues bezalako estiloetara hurbiltzeko egindako ahalegina. Grammy sarietarako makina bat izendapen jaso du eta musikari askorekin jo du, tartean John Lee Hooker, Tom Waits, Eddie Vedder, INXS eta Blind Boys of Alabama. 'The Well' (Alligator Records diskoetxera itzuli zen lan honekin) eta Ben Harperrekin batera grabatutako 'Get Up!' dira bere diskorik berrienak. Bukaera aparta Getxo Blues jaialdiarentzat.