Bere ideia musikalei leiala, konpositore aparta eta interpretatzaile pertsonala. Jose Ignacio Lapidok (‘Lapido’ soilik bere jarraitzaile fidelarentzat) zerbait itxuraz erraza baina bereziki zaila lortzen du: zahartzen ez diren abestiak, urteak joan eta urteak etorri klasiko bihurtzen diren horietakoak.

Hori da konpositore, gitarrista eta abeslari honen meritu nagusietako bat. 80ko hamarkadaren hasieratik espainierazko rock-aren ezinbesteko erreferentea izan da; ibilbide horretan ezin aipatu gabe utzi 091 ahaztezinak, 15 urtez Lapido arima eta sorkuntza-motore nagusi izan zuen taldea.

‘De sombras y sueños’ du izenburu bakarka argitaratu duen seigarren diskoak, orain arte utzi digun berriena. Rock-zintzotasunez beteriko 13 abesti eder dira. Modak joan eta etorri egiten dira. Lapido bezalako jendearen musikak iraun egiten du.