Khea kolektiboa 1998an sortu zen eta ordutik hona antzerkiarentzako adierazpide berriak ikertu eta esperimentatu ditu etengabe. Ahalegin horren emaitza izan zen Mina Espazioarekin elkarlanean sortutako Antzerkiola Imaginarioa.

2010ean, kolektiboaren sortzaileek beren bidea jorratzea erabaki zuten eta Khea Ziater konpainia jarri zuten martxan. Taldearen lehen muntaia da, hain zuzen ere, ‘Gloriaren Kantua’ / ‘La canción de Gloria’ (bertsio bikoitza du, gaztelaniaz eta euskaraz).

Khea Ziater-ek gai unibertsal bat aukeratu du estreinako lan honetarako: maitasuna. Eta gai hori aurkezteko zine klasikoan oinarritutako estetika erabili du; eszenografia horrek  muntaiaren bi pertsonaiak biltzen ditu, elkarrekin emandako egunak gogoratzen ari diren bikotekide izandakoak. 

“Amodioak eta desamodioak guztiok ukitzen gaitu, horregatik lan hau edozein ikuslerentzat egokia izan daiteke”, azaldu du muntaiaren zuzendari eta konpainiaren bultzatzaileak, Alex Gerediaga ‘Kabulian’-ek.