Badira arrazoi ugari eta sendoak ‘La Géographie du danger’ ikusteko. Lehenik eta behin, hurbiltzen digun istorio unibertsala, bidaia luzearen ondoren ezkutatuta eta bakardadean bizitzera behartuta dagoen etorkin klandestinoarena. Baina baita istorio hori aurkezteko Hors Serie konpainia frantsesak aukeratu duen modua ere; izan ere, konpainia honek lan handia egin du hip hop-aren mugak zabaltzeko, dantza klasikoaren eta garakidearen baliabideak erabiliz.

“Beste hip hop dantza mota bat ikustera gonbidatzen zaituzte, nirea, migrazio-fluxuei buruzko gogoeta eragin beharko ligukeen testu sendo eta konprometitu batean inspiratua”, laburbildu du konpainiako zuzendari eta dantzatutako bakarrizketa honetako interpretatzaile bakarrak, Hamid Ben Mahi-k.

Horretarako, Hamid Skif idazle eta kazetari aljeriarraren eleberria egokitu du, dantzaren lengoaia erabiliz; testu horretako zenbait pasarte erabiltzen ditu emanaldian. “Espainierazko azpitituluak proiektatuko ditugu”, aurreratu du.

2000. urtetik, Hors Serie konpainiak dantzaren lengoaia berriak esploratu ditu; lan horren lekuko dira taldeak orain arte sortu dituen zazpi muntaiak. Bere lanak ez dira oraindik oso ezagunak gurean, beraz, aukera aparta dugu zalantzarik gabe ikusleak harrituko dituen proposamen desberdina ezagutzeko.