The Freewheelers 90etan lorratz sakona utzi zuen banda izan zen. Bi disko kaleratu, kontzertu mordoska ederra eskaini eta, batez ere, Luther Russell kantautore estatubatuarra bultzatu zuen, izan ere, taldea utzi ondoren, beste batzuen lanak ekoitzi eta bakarkako bost album plazaratu baititu.

Oihartzun murritzeko lan hauei esker, musikagile “garaikide eta lurpekotzat” jo izan dute, baina Russell-ek ondo frogatu ditu bere gaitasuna eta bere gustu ona; eta oso hasiera groovy eta funkya izan zuen arren ('Down at Kit's'), gerora pop tradizioarekin estu-estu lotuta dauden kantuen sortzaile trebea dela erakutsi du. 'The invisible audience' dugu bere azken lana, eta hemen ere melodia rock modu desberdinekin txertatuta dago, blues primitiboaren eztandak 'A world unknow" dakar, 'Everything you do' Teenage Fanclub-en oroigarria da, eta pieza instrumental ugari dago. Asko aldatu da nerabezaroan Jakob Dylan-ekin batera lehen urratsak eman zituenetik. Onerako aldatu ere.