Testua: Igor Cubillo |
Lou Donaldson, Masters At Work zikloarekin guztiz bat datorren artista da, bereziki BBK Aretoaren helburuari erreparatuta: "nazioarteko jaialdi nagusietatik kanpo, zuzenean nekez ikus daitezkeen mundu osoko genero guztietako musikaririk onenetako batzuk” programatzea. Joan den mendearen erdialdean genero hau profesionalki lantzen hasi zenetik, saxofoi-jotzaile estatubatuarrak etengabeko argia eman dio jazzari, eta bere biografiari so eginez, genero honetako izenik handienetako asko aurki ditzakegu. Charlie Parker-en jatorrizko eraginetatik hasi eta Thelonious Monk, Art Blakey edota Clifford Brown-ekin egindako grabazioetaraino, baina frontman gisa nabarmendu da beti, ez laguntzaile gisa.
Laurogeitaka urteko musikariak Randy Johnson-en gitarra elektrikoaz, Pat Bianchi-ren Hammond B3az eta Fukushi Tainakaren bateriaz lagunduta ekin dio oraingo birari. Elkarrekin, bopa, soul-jazza eta hard-bopa gisako etiketak dituen klase handiko ondarea errepasatu dute, funk garaia baztertuta. Benetako erraldoia.