Estatubatuar honen debut indartsuak soularen eszena eraberritzera behartu zuen ezinbestez, ikono handien itzal luzeak ezartzen zion geraldi ilunetik ateratzeko. Reed-ek hiru disko plazaratu ditu bere gustu onaz eta ahots apartaz. Azkena, 'Come and Get It!'.
Aitaren disko-bilduma zabalak soularen unibertsoan murgiltzeko aukera erraztu zion Eli 'Paperboy' Reed-i, eta hain sakon murgildu zen, non unibertso horretatik ezin irtenda edo irten nahi ez zuela geratu baitzen. Berarena dugu, Otis Redding, Sam Cooke, Wilson Picket eta James Brown bezalako izen handiez hornitutako genero honen historian idatzi den azkenekoa. Presioaren eragin gaiztoetatik urrun, Reed-ek aurrera egin du etengabe, 60etako soinua berreskuratuz eta Staxeko izarren gustu bikainaz eta shouter handien energiaz abestuz.
Brooklineko (Massachusetts) soulmanak gitarra jo, abestu eta dantza egiten du errepertorioa grinaz eta trinkotasunez interpretatu behar duenean, aldakak mugitu nahiz astintzeko. Baterako zein besterako doinu egokiak aurki daitezke 2005etik kaleratu dituen hiru diskoetan, urte hartan hasi baitzen gauzatzen Sam Cooke, O.V. Wright, Bobby Womack eta Conway Twitty miretsi eta True Loves-en sostengua duen artista honen mitoa.
Segur aski asko interesatuko zaizu...
