Vic Chesnutt-i eskainitako 'Mr. M' albuma Nashville-n fakturatutako country alternatiboaren erreferente honen 11. lana da. Kurt Wagner abeslari eta konpositoreak jarraitzen du taldearen buru izaten; hamabost urteko ibilbidean besteak beste soulera, popera eta jazzera ere hurbildu da.

Lambchop, ospe ezin hobea duen taldea, alt-countryaren ordezkari gorenetakotzat ageri ohi da. Hala ere, taldearen ekoizpena ez dator bat generoaren estereotipoekin; nekez imajina daiteke bere musika rodeo batean, eta ez die zehatz-mehatz jarraitzen rock alternatiboaren arauei. Kurt Wagner eta lagunen kantuak sosegatuak dira, trinkoak, pisuak. Sailkaezinak. Batzuetan, minimalismoaren ingurukoak. Hari-atal klasikoa slide gitarrak galdutako protagonismoa irabaziz joan da. Ezer ez da ohikoa Nashvilleko banda honetan. 

‘I hope you’re sitting down’, taldearen lehen albuma, 1994an jarri zen salgai. Azken lana, hamaikagarrena dagoeneko (hamabigarrena, zuzeneko ‘Live at XX Merge’ barne hartuta), ‘Mr.M’ dugu, Mark Nevers ekoizlearen  Nashvilleko estudioan grabatutakoa eta Wagner beraren marrazkiez apaindutakoa, 2009an zendu zen Vic Chesnutt musikari, adiskide, jarraitzaile eta laguntzailearen oroimenez. Egileen esanetan, maitasuna, galera eta eguneroko existentziaren detrituei buruzko meditazio-bilduma da. Guztiz gozoa.