Oso konpainia gutxik eramaten du eszenatokira Da.Te Danza-rena bezalako proposamenik: hiru urte arteko umeentzako dantza, 'Río de Luna' ikuskizunaren muina hain zuzen ere. Bertan munduratzen garenean ditugun komunikazio-baliabideak esploratzen dituzte dantzariek.

Dantza ikuskizun batez goza daiteke ibiltzen edo hitz egiten ikasten ari garenean? Argi dago baietz, eta horren froga garbia dugu Da.Te Danza konpainiaren ‘Río de Luna’ antzezlana, umeek munduaren ezagutzan eta amarekiko harremanetan egin beharreko lehen urratsak irudikatzen dituena.

“Batzuetan ahaztu egiten zaigu umeek beste gaitasun batzuk dituztela, eta ezin dizkiegula eskaini bakarrik barre egiteko gauzak, helduek bezain ondo entzuten eta sentitzen dutelako”, azaldu du grina handiz Omar Mezak, jaialdi espezializatuetan hainbat sari jaso duen taldearen zuzendariak. “Artearen bidez, haurrak eremu ederrak sortzeko gauza izan daitezke”, gaineratu du konpainiaren arduradunak, eta gurasoei zuzenduta, funtzioan umeek “nor bere kasa” ibiltzeko aukera izatea eskatu du.

Honetan oinarrituta, Da.Te Danza taldeak ikusmenerako poesiaz beteta dagoen ikuskizuna sortu du, publikoa protagonista duena. Era  honetako lan guztietan bezalaxe, aurretik ikerketa lan sakona egin du.