Antzezlan harrigarri eta dibertigarri honek umorezko eszena bihurtzen ditu Shakespeareren lanetako pasarterik ezagunenetako batzuk. Quico Cadaval galiziarra du buru mirari txiki bezain gomendagarria obratu duen aktore-multzoa.

Den-dena asmatuta zegoela zirudienean, hara non, baten bati William Shakespeareren testuetan oinarritutako umorezko sketchak egitea bururatu zaion. Evaristo Calvo eta Victor Mosqueira komiko galegoak izan ziren halakoxe burutazio eta ausartzia izan zutenak, eta harez geroztik 18 urte egin dituzte 'komedia garaikidearen komando' gisa, haien hitzetan.

‘Shakespeare para ignorantes’ antzezlanean, hitzaldi bitxia proposatzen digute aditu ezin bitxiago baten eskutik, britainiar idazle unibertsalaren alderdirik ezezagunena azaltzeko asmoz. Hortik aurrera, antzezleek publikoarekin bat eginda jardungo dute,   ‘MacBeth’, ‘Hamlet’, ‘Otelo’, ‘Romeo eta Julieta’ eta beste antzezlan batzuetako eszena desberdinetan zehar antolatutako ibilaldi batez, barrez lehertzeko moduko berrinterpretazioa osatuz, egileak zer pentsatuko zukeen gogoan hartu gabe.

Aukera paregabea antzezlan desberdin batez barre egiteko. Eta irekita dago, noski,   Shakespeareren lanik ikusi ez dutenentzat ere.