Barre egingo zenuke zure ahizpa/arrebak giltzurrun bat eskatuko balizu, karamelu bat eskatzen den bezalaxe? Antzezlan honekin, ziur baietz, horixe da-eta Caramala konpainia gazteko hiru emakumezko antzezleek sortutako komedia dibertigarri honen proposamena.

Zer egingo zenuke senide batek giltzurrun bat eskatuko balizu? Ba, adibidez, umore onez hartu. Horixe proposatzen digu Caramala Malagako konpainia gazteak, Virginia Muñoz, Carmen Baquero eta Noemí Ruiz antzezleek sortutako taldearen proiektuak, beraiek ere gazteak baina hegaldi-ordu pilatutakoak bai antzerkian eta bai hainbat telesail ezagunetan. Horren emaitza da ‘Caramelo’, itxuraz elkarrekin ondo moldatutako familia baten larruaren azpian dagoen errealitateaz barre egiteko aukera ematen digun komedia gazi-gozoak.

“Giltzurrunarena aitzakia da anaia-arreben arteko harremanaz, elkartasunaz eta eskuzabaltasunaz jarduteko. Hori guztia inor mintzen ez duen umore atseginez”, dio Muñozek, emaile-elkarte batzuek antzezlana beraien ekitaldietan antzezteko eskatu dietela nabarmenduz. “Eta guztia andaluzieraz antzeztuta”, erantsi du azentuak kilometrotako distantziara saltatzen duen antzezleak.

Aukera aproposa atsedenalditxoa hartu eta gure buruaz barre egiteko; agian gauzak hain serioak ez direla ohartuko gara eta.