Rockabillyrik dinamikoena eta r&r klasikoa atsegin ditu gehien Kim Lenzek, pin up estetika ere gustuko duen ieta The Jaguarsekin lau disko kaleratu dituen ilegorri kaliforniarrak. Berriena aurkeztuko du, 'It's all true'; bertan Big Sandyrekin kolaboratu du.

Wanda Jackson-ek emakumezko rockabillyaren tronua erreibindikatu du Jack White aitapontekoa duen comebackaren bidez. 74 urte ditu, eta duela mende erdi jabetu zen tronuko aginte-makilaz. Artista honen jarraitzaileek negar egingo dute hiltzen denean, baita elkarrean artean lehiatu ere lekukoa hartzeko. Hauen artekoa dugu Kim Lenz, Los Angelesen finkatutako kantari, musikagile eta gitarra-jotzailea.

Oraingo biran, Lenzek laugarren diskoa dakarkigu, ‘It’s all true!’ (Riley Records), The Jaguars-ekin grabatutako rockabilly deskarga, jazz-kutsua eta aldizkako swing-kulunkak txertatzen zituzten aurreko lanak baino sendoagoa. Bere proposamen revivalzaleak 50eko urrezko hamarkadara garamatza, bai soinuan, gitarra arin bezain sendoak eta kontrabaxu indartsuan oinarritutako base egonkorrak tarteko direla, bai eta landa giroko pin-up estetikari dagokionez ere. Baina kantaria ez da panpina ilegorri hutsa. Bere jarrera sentsualaren atzean, taula gainean barruko guztia ematen duen piztia ezkutatzen da, ikuslea erakarri eta dantzan jartzea xede duena. Go cat, go!!