Euskadiko Orkestrak Txaikovski / Musorgski izeneko programa aurkeztu du 2025/26 Denboraldi Sinfonikoaren seigarren hitzordu gisa. Kontzertuak urtarrilaren 26an izango dira Donostiako Kursaal Auditoriumean, 27an Gasteizko Jesus Guridi Kontserbatorioan, 28an Bilboko Euskalduna Jauregian eta 29an berriz ere Kursaalen, guztiak 19:30ean. Errusiar errepertorioaren handitasuna eta sorkuntza garaikide euskalduna uztartzen dituen proposamena da, publikoari bidaia emozional eta estetiko trinkoa eskaintzeko asmoz.

Programaren ardatz nagusietako bat izango da Felix Ibarrondo oñatiarraren Guernica lanaren estreinaldia. Obra honek Bizkaiko hiribilduaren 1937ko bonbardaketaren inguruko gogoeta artistikoen tradizio luzearekin egiten du bat, baina ikuspegi berezitik: konpositoreak edozein irakurketa deskriptibo edo programatiko baztertu du, dimentsio hunkigarri eta sinbolikoan sakontzeko. «Garrasia, barneratutako mina, zauri iraunkorra, gau amaigabea eta, azkenik, iraungipena» dira bost ataletan egituratutako partituraren ardatz tematikoak, memoria kolektiboarekin lotura sotila eraikiz.

Estreinaldi horrekin batera, Txaikovskiren Biolinerako Kontzertua izango da beste mugarri handia. 1878an sormen-zurrunbilo batean idatzia, hasieran Leopold Auer birtuosoak «joezina» zela iritzita baztertu bazuen ere, laster bihurtu zen instrumenturako kontzertu handienetako bat. Hura interpretatzeko, Euskadiko Orkestrak Bomsori gonbidatu du, Hego Koreak azken urteotan eman duen biolin-jotzailerik bikainenetako bat. Deutsche Grammophon zigiluko artista da, eta munduko hiru lehiaketa handienetan —Helsinkiko Sibelius, Belgikako Queen Elizabeth eta Moskuko Txaikovski— irabazle edo finalista izan da; azken horretan, hain zuzen, orain entzungo dugun kontzertua interpretatu zuen.

Programa Mikhail Glinkaren Ruslan eta Liudmila obraren oberturarekin hasiko da, bost minutu eskasetan orkestraren energia osoa pizten duen pieza distiratsuarekin, bereziki harien atalean. Eta amaiera emateko, Modest Musorgskiren Erakusketa bateko koadroak entzungo dira, Maurice Ravelen 1922ko orkestrazio ospetsuan. Viktor Hartmann margolariaren heriotzaren ondorengo erakusketa batean inspiratua, suite honek bisitariaren esperientzia estetikoa artearen botere eraldatzailearen soinu-kontakizun bihurtzen du, melodien indarrari, irudimen musikalari eta musikaren eta pinturaren arteko lotura estuari esker.

Ana Maria Patiñoren zuzendaritzapean

Euskadiko Orkestraren podiumean Ana Maria Patiño zuzendari kolonbiarra izango da, etorkizun handiko promesa. 1995ean jaioa, Medellinen ikasi zuen Alejandro Posadaren gidaritzapean, eta ondoren Zurichen Johannes Schlaeflirekin. 2020an Sir George Solti Nazioarteko Zuzendaritza Lehiaketan finalista izan zen, eta 2019an Alemaniako Dirigenten Forum irabazi zuen, nazioarteko eszenan bere izena sendotuz.

Bomsoriren birtuosismoa, Ibarrondoren sorkuntza berria eta errusiar errepertorioaren klasiko handiak batzen dituen programa honekin, Euskadiko Orkestrak musikaren bidezko memoria, emozioa eta edertasuna uztartzen dituen proposamen sendoa eskaintzen du. Sarrerak salgai daude jada Donostia, Gasteiz eta Bilboko kontzertuetarako, urtarrilaren amaierako astea musika sinfonikoz betetzeko prest.