Musika esperimentaleko programaren barruan, hurbileko eta nazioarteko artisten soinu-lanak ezagutzera emateko, gure artean izango dugu Londresen bizi den Dimitra Lazaridou-Chatzigoga musika konposatzaile eta hizkuntzalari greziarraren proiektu bat.
Zitara instrumentu nagusitzat hartuta, musika esperimentaleko eta inprobisazioko profesionala da 2006az geroztik. Soinu sostenituak eta pikortatuak sortzen ditu, erresonantzia-kutxan 'ebowak' eta zenbait objektu erabilita. Haren lanaren ardatza bat-batekotasunaren eta landutako tekniken artean kokatzen da.
Partaide izana da hainbat inprobisazio-taldetan, besteak beste, Jennifer Allum, Alfredo Costa Monteiro, Angharad Davies, Rhodri Davies, Matt Davis, Axel Dörner, Birgit Ulher eta Daichi Yoshikawarekin. Bakarkako lehen diskoa, ‘Stroke by stroke’, 2011n argitaratu zuen, ‘Organized Music from Thessaloniki’ zigiluarekin.
Harrez gero, ‘MOBILE nº2 OR odds ratio’ online proiektua aurkeztu zuen Another Timbre-n, Nate Wooley, Cremaster (Alfredo Costa Monteiro eta Ferran Fages), Xavier Charles, Enrico Malatesta eta Christian Weber-ekin, eta ‘Bauchredner’ duoa Cathnor Recordings-en, Martin Küchenekin batera. Martxoaren bukaeran, Mikrotonek aurreikusitakoaren arabera, ‘Borough’ argitaratuko du: The Holy Quintet eta Johnny Changen, Jamie Drouin, Dominic Lash eta David Ryanen arteko topaketa bereziaren dokumentu bizia izango da.
Azken urteetan, Londresen eta inguruetan aritu izan da batez ere, orain dela gutxi Berlinen jo izan duen arren. Oraindik orain, musika birbideratzeko dauden askotariko moduak aztertzen ari da arretaz.
Harekin batera, Bilbon bizi den Jonathan García Lana belgikarrak, ezizenez ‘Tunipanea’, maiatzaren 16an eta 17an izango den ‘Luthiertza Esperimentala’ tailerraren emaitza eskainiko du.