Musikari galestar honek The Velvet Undergrounden arrakastak sinatu zituen eta talde horrekin legenda bihurtu zen 60 hamarkadan. Musikari geldigaitz, azkar eta esperimentaziozalea, bakarkako ibilbide interesgarria du. Horren fruitu berria da 'Extra playful' EPa.

John Davis Cale aski ezaguna da Lou Reed-ekin batera The Velvet Underground rock-talde legendarioa sortu eta aurrera ateratzeko egin zuen lanagatik. Hala ere, musikari, musikagile eta ekoizle galestarrari zuzendutako eskerronak ez dira haren biografiaren pasarte garrantzitsu horretara mugatu behar, oraingo uneraino ere luzatu behar da, musikaren bilakaeraz eta formula berrien bilaketaz konpromiso argia duen artista izaten jarraitzen baitu. Inkonformismo horren azken emaitza dugu ‘Extra playful’, 2011an argitaratutako EPa, esperimentatzeko grina eta sofistikazioarekiko eta egitura ez-konbentzionalekiko zaletasuna berresten dituena. 

Avant-garde eta art rock bezalako etiketak Caleren lanari itsatsita geratu dira hirurogeiko hamarkadan New Yorken finkatu zenez geroztik. Handik hona, 30 album baino gehiago kaleratu ditu, eta emanaldi bakoitzean, rockaren eta are musika garaikidearen historia-zati bat bistaratzearen ‘emozioa’ eragiten du.