Dozena bat diskotan, Lagartija Nick rock hutsetik esperimentazio elektronikora igaro da, flamenkoa zeharkatuz eta kontzeptu geometrikoak, astronomikoak eta ebolutiboak aldarrikatzen dituzten gai errepikariei uko egin gabe. Bere eklektizismo bitxiaz, Enrique Morente kantariaren ondoan Lorcaren obra aldarrikatu dute; album bat eskaini diote guru elektronikoen maisutzat jotzen den José Val del Omar poeta eta zinegileari, eta aurretiaz grabatutako oinarri azkarrak gitarra gartsuekin eta sci-fi tankerako giroztapenekin uztartu dituzte.

Antonio Ariasen esanetan, Granadakoa banda erretroaurrerakoia da, iragana eta etorkizunaren arteko loturak bilatu eta Jules Verneren moduko hizkera ameslaria landu duena. Kantari, baxujole eta musikagileak lideratzen du 1990az geroztik, eredu finkoetatik at ‘Hipnosis’ izenburuko debut diskografiko osoa berreskuratu duen taldea. Jatorrizko kideak tarteko direla: Arias, Eric Jiménez, Juan Codorniú eta M. A. R. Pareja. Sekulakoa.