Atseden hartuta joan behar da Maceo Parker-en (Kinston, 1943) kontzertuetara, saxofonista estatubatuarrak dantza premiazko eginkizun bilakatu duten saio luzeez gozatzera ohitu baitutu bere jarraitzaileak. Erritmoa du jainko, eta honen apostolu nagusietakoa dugu funkaren aitzindari hau, 'unibertsitate' ikasketak James Brown bultzatu zuen JB Horns metaleko talde zoragarria lideratuz egin baitzituen 1964tik 1975era bitartean.

Geroko urteetan, George Clinton (beste mito bat) eta Bootsy Collins-ekin batera lan egin, Prince-rekiko birak eta era askotako kolaborazioak eta abenturak jorratu zituen, harik eta 1990ean bakarkako jardunean mugildu zen arte. Handik hona, Parker, eragin desberdinei eta hip hop, jazz, acid jazz eta soularekiko fusioei irekita dagoen soinu ultrafunk sinkopatu, urbano eta sofistikatu samarrarekin lotuta dago. Hau protagonistatzat hartuta landu du bere azken lana, 'Soul classics', Stevie Wonder, James Brown, Isaac Hayes eta Aretha Franklin-en bertsioak biltzen dituena.