2030 BAI! zikloa Bilbao BBK Liveren aperitibotzat planteatzen da, jaialdiak hasiera-hasieratik defendatu duen konpromiso sozial eta kulturalaren isla gisa. BBK Banku Fundazioarekin, Eusko Jaurlaritzaren Berrikuntza Sozialaren eta 2030 Agendaren Zuzendaritzarekin eta Donostia Zinemaldia-rekin elkarlanean antolatuta, programazioak giza eskubideak, jasangarritasuna eta gaur egungo gizarte-erronkak ditu ardatz, zinema kontzientziazio eta elkarrizketarako tresna gisa ulertuta.

Aukeratutako lau filmak —Maspalomas, La voz de Hind Rajab, Yo, Capitán eta Belén— Zinemaldiko Agenda 2030 Sarian izendatuak edo sarituak izan dira. Sari horrek bost urte daramatza Garapen Jasangarrirako Helburuekin bat datozen lan zinematografikoak bultzatzen, eta zikloak zuzenean lotzen ditu sorkuntza artistikoa, berrikuntza soziala eta pentsamendu kritikoa. Musika ere funtsezko elementu narratibo gisa txertatzen da, pantailan kontatzen diren istorioei tentsioa, argitasuna eta sakontasun emozionala emanez.

Zikloa otsailaren 5ean inauguratuko da, ekitaldi instituzional baten ondoren Maspalomas filmaren proiekzioarekin. Bederatzi Goya saritarako izendatua izan den lana jatorrizko bertsioan eskainiko da, euskaraz, gaztelaniazko azpitituluekin, eta emanaldiaren ostean solasaldia egingo da zuzendarietako batekin eta José Ramón Soroiz protagonistarekin. Ondoren etorriko dira La voz de Hind Rajab (otsailak 10), Nazioarteko Film Onenaren Oscar sarirako izendatua; Yo, Capitán (otsailak 19); eta Belén (otsailak 26), azken hau Iberoamerikar Film Onenaren Goya sarirako hautagai. Hiru emanaldi horiek ere solasaldiekin osatuko dira, zinemagile, aktibista eta espezialisten parte-hartzearekin.

Inklusioa eta berdintasuna

Zikloan zehar inklusioa, berdintasuna, haurrak, migrazioa, justizia eta autonomia bezalako gaiak jorratuko dira. Filmetako soinu-bandek —Arantzazu Callejaren sotiltasun emozionaletik, Marilina Bertoldiren elektronika trinko eta zehatzera, edo Andrea Farriren epika neurritsura— istorio bakoitzaren karga sinbolikoa indartzen dute.

Sarrera doakoa izango da, aldez aurretik erreserba eginda bilbaobbklive.com webgunean, edukiera bete arte. San Miguel etxeak babestutako 2030 BAI! zikloak hiriko kultur erradioa zabaltzen du, zinema, pentsamendua eta komunitatea elkartzen dituen topagune gisa.