Zinemaren eta zientziaren arteko elkarrizketa sendotuta itzuli da Zinema eta Zientzia bere bederatzigarren edizioan. Euskadiko Filmategiak, Donostia International Physics Centerrek (DIPC) eta Donostiako Zinemaldiak sustatutako programak urtarriletik martxora bitartean Gasteiz, Donostia, Bilbo, Iruña eta Donibane Lohizune zeharkatuko ditu, pentsamendu kritikorako gonbita egiten duen film hautaketa batekin.

Proposamenak fikzioaren eta dokumentalaren bidez biologiarekin, fisikarekin, ekologiarekin, antropologiarekin, matematikarekin edo filosofia garaikidearekin elkarrizketan dauden lanak biltzen ditu. El planeta de los simios bezalako klasikoek gizateriaren aurrerapen eta atzerapausoei edota joera autoritarioei buruzko gogoeta pizten dute; Haur basatiak, berriz, gizatasunaren muina esploratzen du hizkuntzaren eta afektuen bidez. Orainaldi teknologikoaren ernamuinak Sare sozialan ageri dira, eta arrisku kolektiboaren aurrean portaera soziala Los pájaros lanean berrirakurtzen da.

Zikloak arreta berezia eskaintzen die dimentsio etiko eta biologikoei La mosca filmarekin; emakumeek musika elektronikoan egindako ekarpen aitzindariak ikusarazten ditu Sisters with Transistors lanak; eta talentuaren, generoaren eta matematikaren arteko bideak jorratzen ditu La Voie Royalek. Ibilbidea osatzeko, Europako memoria (Hirugarren gizona), antropologia (La balada de Narayama), bizitzaren amaierari buruzko gogoeta (Los destellos) eta etorkizuneko iruditeria ekologikoa (Nausicaä del Valle del Viento) lantzen dira; azken honek emango dio amaiera edizioari.

Zikloaren bereizgarrietako bat publikoarekin duen elkarrizketa zuzena da. Emanaldi bakoitzean, biologia, kimika, neurozientzia, antropologia edo filosofia bezalako arloetako adituek filmak aurkeztu eta eztabaida sustatuko dute. Guztira, hogei bat zientzialarik hartuko dute parte solasaldi horietan, zientziari begirada irisgarri eta askotarikoa eskainiz.

Jarduera paraleloak

Horrez gain, jarduera paraleloek programa aberasten dute: La mosca filmaren harira Ginés Morata biologoak eskainiko duen hitzaldiak, eta bizitzaren amaierari buruzko mahai-inguruak, Pilar Palomero zinemagilea eta Ander Urrutikoetxea onkologoa protagonista dituela, zinemaren, zientziaren eta literaturaren arteko elkarguneak zabalduko dituzte.

Sarrera prezio eskuragarriekin eta doako jarduerekin, Zinema eta Zientziak berresten du zinema pentsamendurako hizkuntza unibertsala dela, zientzia gizartera hurbiltzeko eta pantailan agertzen diren irudietatik mundua ulertzen laguntzeko.