Zientzia, Unibertsitate eta Berrikuntza Sailak hainbat erakunde zientifikorekin elkarlanean prestatutako atariak modu ulergarrian azaltzen du nola sortzen den eguzki-eklipse oso bat, zein izango diren haren faseak eta Euskadiko toki bakoitzean zer ikusi ahal izango den. Horrez gain, udalerriz udalerriko ikusgarritasun-mapak, baliabide didaktikoak, deskarga daitezkeen materialak eta hitzaldi, erakusketa nahiz jardueren agenda ere eskaintzen ditu. Horri esker, webgunea gida erabilgarria da egun berezi hori prestatzen laguntzeko.

Kanpainak arreta berezia jartzen du eklipsea segurtasunez behatzeko gomendioetan. Eguzkiari babes egokirik gabe zuzenean begiratzeak erretinan kalte larriak eta atzeraezinak eragin ditzake, Eguzkiaren zati handi bat Ilargiak estalita dagoenean ere. Horregatik, Eusko Jaurlaritzak ISO 12312-2 araua betetzen duten betaurreko homologatuak soilik erabiltzea gomendatzen du, eta baztertu egiten ditu erradiografiak, kristal belztuak edo antzeko baliabide inprobisatuak. Era berean, prismatikoak, teleskopioak eta argazki-kamerak eguzkirako berariazko iragazkirik gabe ez erabiltzea aholkatzen du.

Webguneak eklipseen balio zientifikoa ere azaltzen du. Fenomeno horiei esker helioa aurkitu zen lehen aldiz, eta Albert Einsteinen erlatibitatearen teoria baieztatzeko behaketa garrantzitsuak egin ahal izan ziren. Gainera, Arabako Erribera Beitian (Ribabellosa) 1860an izandako eklipsea ere gogora ekartzen du; han egin baitziren eguzki-eklipse oso baten eta eguzki-protuberantzien lehen argazkietako batzuk.

Kanpainaren osagarri gisa, "Bi ilunabarren eguna" izeneko erakusketa ibiltaria hainbat herritatik igaroko da datozen asteetan, panel, baliabide interaktibo eta dibulgazio-jardueren bidez fenomeno astronomiko apart hau herritarrengana hurbiltzeko.

Eklipsea Nafarroan nola biziko den jakin nahi dutenek gure atarian argitaratutako erreportajea ere kontsulta dezakete. Informazio ofizial guztia —ikusgarritasun-mapak, segurtasun-gomendioak eta dibulgazio-baliabideak— Eklipsea Euskadi webgunean dago eskuragarri.