Bigarren urtez jarraian, musikak berezko tokia izango du Durangoko Udako egitarauaren barruan, Plateruena Kafe Antzokiak antolatutako Jazzeruena jazz zikloari esker. Horren barruan antolatutako lau kontzertu izango ditu aparteko osagarri kaleko antzerkia, zirku garaikidea, musika jasoa eta garaikidea, eta dantza barne hartzen dituen egitarauak.
Musika atalari dagokionez, bertako bi talderen partehartzea nabarmendu behar da: Bogoroditsie abesbatza, Shakespeareren ‘Udako gau bateko ametsa’ lanaren egokitzapen librea aurkeztuko duena; eta Amaia Urzainki sopranoa, gaua hari gidari hartuta ‘Overnight’ izeneko errepertorioa abestuko duena, Robert Oviedo pianistarekin batera.
Kaleko antzerkiak ez du inoiz hutsi egiten Udagiro zikloan eta aurten genero horren bi erakusgarri bikain aurkeratu dituzte antoalatzaileek: ‘Kale gorrian’ (Barsanti konpainia), etxegabetzeen gai korapilotsuari egindako kritika dibertigarria; eta ‘Prozak’, Malas Compañías konpainia bikainaren zirku garaikideko pieza berria. Zikloa dantza garaikideko bi piezarekin itxiko da: Amaia Elizararen ‘Block’ eta Movea Danza konpainia katalanaren ‘Conseqüences’.