Duela bost hamarkada, Laboak eta Artze anaiek abangoardiaren esperimentazioan sakondu eta Ikimilikiliklik sentikaria plazaratu zuten, musika, poesia, arte plastikoa eta txalapartaren erabilera berritzailea uztartuz. Emaitza hura euskarazko modernitatearen mugarri bihurtu zen. Gaur, galdera bera berriz plazaratzen da: zer da abangoardia izatea gaur?

Edurne Azkarateren zuzendaritzapean, 90 minutuko ikuskizunak musika, hitza, dramaturgia, zuzeneko ikus-entzunezkoak eta txalaparta bateratzen ditu esperientzia bakarrean. Argiztapen diseinu zainduak eta soinu-espazio landuak eszenaren intentsitatea eta sentsorialtasuna indartzen dute, ikuslea giro murgiltzaile batean kokatuz.

Eszenan, bi garairen arteko zubia eraikitzen duen lantaldea bildu da: Iñaki Salvador —Laboaren kolaboratzaile historikoa—; Oreka Tx; Libe Kortazar; Intza Alkain; eta Itziar Garaluce, ikus-entzunezkoen arduraduna. Salvadoren presentziak memoria eta jarraipena bermatzen ditu; Oreka Tx-en indar erritmikoak tradizioaren eta esperimentazioaren arteko talkari eusten dio; eta gainerako sortzaileek ahotsa, dramaturgia eta irudia uztartzen dituzte gaurko begiradatik.

Loraldiaren formatu handiko apustua

IKIMILIKILIKLIK Vol.2 Loraldiaren ekoizpen propioa da, jaialdiaren ildo estrategikoarekin bat datorrena: berrikuntza sustatzea, belaunaldien arteko elkarrizketa aktibatzea eta euskarazko sorkuntza garaikidea plaza erdigunean kokatzea. Emanaldia martxoaren 12an izango da Arriaga Antzokian.

Ikuskizunak iraganeko ausardia gaurko galdera bihurtzen du: ondarea errespetatuz, baina gaurko sormenak behar duen askatasunez.