2019-03-28
'Apocalipsis' du izenburu 2006tik El Circo de los Horrores-ek sortu duen laugarren ikuskizunak. 'Mad Max' filmaren mundua gogora dakarren estetika futuristako rock opera, kolapsora iritsi den mundu batean bizirauteko borroka islatzen duena. Antzerki, musika eta zirku fusio ikusgarria.
Milaka ikusle aho bete hortz utzi ditu Susa Silva maisuaren lan berriak. Apocalipsis du izenburu hark sortutako laugarren ikuskizunak.. Hiru milioi euroko inbertsioarekin, zirku kontzeptu berriaren adierazgarri nagusi bilakatu da berrikuntza eta teknologia uztartzen dituen proposamen eszeniko erraldoia.
Gerrak, lehorteak, gaixotasunak, ingurumen kaosa eta arrazen arteko gatazkak nagusi diren mundu batera garamatza Apocalipsis-ek. Ikuskizuna luze samarra bada ere (bi ordu inguru) begiak ez dira iristen eszenografiako xehetasun guztiez jabetzeko. 208 m koadroko eta 4 k definizioa duen pantaila erraldoiak biltzen du espektakulua. Teknologia horrekin batera, Mad Max filmaren estetika gogora dakarten hainbat osagai: eszenografia, jantziak eta beste hainbat tramankulu. Rockak eta operak bat egiten dute ikusleen grina eta sentimendurik samurrenak pizteko, show bizkor eta intentsu batean. Ikuskizunari buruzko xehetasunak azaldu gabe, hiru puntu nabarmendu behar dira. Lehenik eta behin, txalogarria da parte-hartzaile guztien kalitate tekniko eta artistikoa, konpainia honetan ohi den bezala, txartelak balioztatzen dituzten langileak, bideo eta audio teknikariak eta artistak barne direla. Bigarrenez, instalazio berriak aipatu behar dira, ikusle guztiek ikuskizunaz gozatzeko aukera baitute oztoporik gabe eta aurrera begira, karpa erraldoi baten barruan. Horren harira, tamalez, ez da behar bezala ikusten Freestyle Motocross saioa, teknikoki izugarri konplikatua izanik horrelako areto batean, ikusleek ia ez baitute astirik agertokian gertatzen ari denaz jabetzeko. Hirugarrenez, ikuskizunean zehar erabiltzen duten umore pikaro, lizun eta heldua nabarmendu behar da, ezinbesteko erregai emozionala saioak behar bezala funtziona dezan.
Segur aski asko interesatuko zaizu...
