Ez da ideia ona Sex Museum taldeari zuzenean erronka jotzea. 1985etik Fernando eta Miguel Pardo anaiak buru dituen talde madrildarrak 30 urteok baliatu ditu kohesioa eskuratu, eta soinu boteretsu bezain konpaktua sortzeko; nagusiki garajetik eta hard rocketik edaten duen soinua, inguru honetan inork ez bezala menderatzen dituzten generoak. Hori dela eta, albiste ona da bere emanaldi bakoitza, Coronas surferrek eta Corizonas hautseztatuek (taldeko kideen beste proiektuak) hartzen duten atsedenaldi bakoitza. Ospatzeko moduko albistea dugu, beraz, taldeak Big City Lies album berria aurkezteko bira martxan jarri izana.

Lan horretan jatorrirako itzuleratzat jo daitekeena islatu dute, 'Fuzz Face' eta 'Independence' albumen garaietara. Izan ere, teklaz eta 'fuzz'-ez betetako garajeko soinuak berreskuratu dituzte. Pultso irmoz, ohiko trebezia eta indarraz, leiho berriak irekitzen dituzten gaztelaniazko bi pieza (Judee Sill eta Odio) gehitu dituzte. Revival hutsetik harantzago.