Enrike Solinís-ek sortu zuen Euskal Barrokensemble, 2006an, eta harrezkero taldeak bere lekua egitea lortu du antigoaleko musikaren arloan nazioartean. Taldearen ezaugarri nagusiak, ezagun egiten duten bereizgarriak, interpretazioen freskotasuna eta hurbiltasuna dira, tarte nabaria eskaintzen baitie inprobisazioari eta garai oso desberdinetako musika ikuspuntu nabarmen pertsonaletik birsortzeari. Horri esker, Euskal Barrokensemblek, nazioarteko kritikaren oniritzia ez ezik, askotariko ikus-entzuleena ere jaso du, taldearen zuzeneko emanaldiak biziak eta sentimenduz beteak baitira.