Martia 2022an sortutako musika taldea da, Sopelako bi kidek osatuta: Andoni Ortiz eta Joana Moso. Haien sustrai musikalak folk doinuetan errotuta daude, eta erreferenteen artean daude Zach Bryan eta The Lumineers bezalako artistak. Hala ere, haien proposamena ez da akustikora mugatzen: gitarra akustikoetatik abiatzen den soinua bada ere, pedalen bidez geruza eta atmosfera sonoro zabalagoak eraikitzen dituzte. Zuzenekoan, pedalen erabilerak funtsezko papera hartzen du: bi ahots eta bi gitarrek sortzen duten oinarri akustikoa handitu eta eraldatu egiten baititu, diska oholtza gainera eramanez.
Zeru Oro Urez da taldearen lehen diskoa, eta gaztaroaren ibilbidean, izanaren eta ez izatearen arteko prozesu konplexuan, bizitako sentipen eta galderen inguruko kanta bilduma da.