Amaia Tirapu (ahotsa, gitarra), Iñaki Lòpez (ahotsa, gitarra), Alex López (bateria), Iñigo Andion (baxua)

Kokoshca ezarritako eskuliburu edo estiloei jarraitu ordez senari eta iparrorratz emozionalari jarraitzen dieten talde horietako bat da. Taldea 2008an sortu zen Iruñean, 8 disko grabatu ditu, eta zintzotasunez eta pasioz zeharkatzen ditu Espainiako pop-rock independentearen bideak.

Taldearen musikak gainezka egiten duen izaera propio bat du ezaugarri bereizgarri, eta ez da erraza katalogatzen. Beren eklektizismo estilistikoaren barruan, rock klasikora eta pop urratura jotzen dute, baina, horrez gain, askotariko musiken eragina jasotzen dute, hala nola elektronikarena, cumbiarena, corridoena eta krautarena. Edonola ere, pieza bakoitzaren estiloa edozein izanik ere, Kokoshca talde ezaguterraza da beti, eta soinu propio nahasezina du.

Taldearen errepertorioa indie musikako gaztelaniazko klasikoz beteta dago, gitarra gordinak melodia leunekin uztartzen ditu eta koroa egitera bultzatzen duten leloez betetako letrak dituzten abestiak ditu. Abesti horiek maitasunari, memoriari, etorkizunari (edo, hobeto esanda, etorkizunik ezari), desadostasunei eta helduaroa helmuga gisa onartzeko erresistentziari buruzkoak dira.

Eta taldearen jarrerak eta energiak gau amaigabeetan murgiltzera eramaten gaituzte, punka gogora ekartzen diguten, baina nostalgiaren, ironiaren, umorearen eta gogoetaren ukitua ere baduten inkonformismoaz eta irreberentziaz kutsatzera.

Kokoshcak Jazzaldian eskainiko duen kontzertua komunitate-ospakizuna izango da, eta Divino Tesoro (2026) disko berria izango du ardatz. Diskoa taldearen ibilbidea markatu duten 11 abestiren bilduma da. Zalantzarik gabe, talde paregabe honen abesti arrakastatsuez berriz gozatzeko aukera bikaina.