Art&Music programaren proposamenak museoko espazio ikonikoa agertoki bihurtzen du, nazioarteko zein estatuko artisten zuzeneko emanaldien bidez. Horrela, musika beste adierazpen artistiko batzuekin eta Guggenheim Bilbao museoko arkitekturarekin lotzen duen esperientzia kulturala planteatzen du.

Bolonian bizi den Andrea Vanzo musikari eta konpositorea da. Bere ibilbidean zehar hainbat sari jaso ditu, eta konposizio postminimalistak lantzen ditu, giro goxo eta nostalgia-kutsukoak sortuz. Bere musika-lengoaian musika klasiko garaikidearen elementuak eta poparen baliabideak uztartzen dira, izaera zinematografikoko soinu-unibertsoa osatuz.

Vanzoren sorkuntza-lanaren abiapuntu nagusietako bat pianoa da. 2022ko urrian Intimacy Vol. 1 argitaratu zuen, bakarkako pianorako piezez osatutako lana. Diskoa sortzeko, berarentzat esanahi emozional berezia zuten lekuak hartu zituen inspirazio-iturritzat, besteak beste bere etxea eta Italiako paisaiak. Konposizioetan naturaren eta gizakiaren arteko harremana, maitasuna, emozioak eta adierazpen-askatasuna agertzen dira.

Proiektu horrek nazioarteko oihartzuna izan zuen 2024an. Otsailean eta martxoan Europako lehen bira egin zuen, Londres, Paris, Berlin, Milan, Madril eta Bartzelonan zortzi kontzertu eskainiz, eta guztiak sarrerak agortuta. Urte bereko martxoan, AEBetako Game Audio Network Guild erakundearen G.A.N.G. saria jaso zuen The Legend of Zelda bideo-jokoko Song of Storms piezaren bertsioagatik.

Proiektuaren bigarren atala

Orain, Vanzok Intimacy proiektuaren bigarren atala aurkeztuko du. Intimacy Vol. 2 2025eko udazkenean argitaratu zen eta aurreko lanaren piano bakarlarirako ikuspegi intimoari jarraipena ematen dio. Disko berria nazioarteko bira baten ardatza izango da, eta Bilboko emanaldia bira horren barruan kokatzen da.

Kontzertua urriaren 11n, igandean, 22:00etan hasiko da. Museoa 20:30ean irekiko da bisitarientzat, eta ordutik aurrera Art&Music programaren esparruan erakusketak eta Atrioaren ingurunea ezagutzeko aukera izango da. Sarrerak salgai daude; Museoko Lagunek deskontua izango dute, dagokien kodearen bidez.