Zerbait berria sortzea da edozein artistak aurre egin beharreko erronka nagusietako bat. Helburua tresna tradizionalak erabiliz betetzeak are zailago bihurtzen du eginkizuna; oso sortzaile gutxik dute hori egiteko gaitasuna. Eta agian horixe da Alos Quartetek bere ibilbidean zehar azaldutako meritu nagusia: hari-musikaren soinu tradizionaletatik abiatuz, soinu klasiko eta aldi berean garaikidea sortzen duen espiritu berritzailea, sustraiei lotutakoa baina erabat unibertsala. Bertute horiek nabariak dira ‘Garden’ (2015) diskoan, talde interesgarri honen lan berrian.

Hari-lauko klasikoak eskaini dezakeen moldakortasuna erakutsi dute taldea sortu zenetik Xabier Zeberiok (Nyckelharpa, biolina), Francisco Herrerok (biolina), Lorena Nuñezek (biola) eta Pello Ramirezek (biolontxeloa). Horri esker, Dulce Pontesen mailako artistekin lan egiteko modua izan dute, oraingoz disko berri honetako 13 piezak erakusgarri berriena duen jardunbide oparoan. Balsetik tangoraino heltzen diren doinuak bildu dituzte bertan, euskal sustraidun musika bazterrean utzi gabe. Eñaut Elorrietan abeslariaren eta Harkaitz Cano idazlearen kolaborazioek borobiltzen dute zuzenean Aukeran dantza konpainiarekin eta Oreka Tx txalapartari bikotearekin batera aurkezten ari diren albuma