Noa Lur (Bilbo, 1983), kantaria izan nahi eta telebista-saio batetik igaro ondoren horretan tematzen den neskaren ametsean bizi izan da. Baina ez du 'Operación Triunfo', 'La Voz' eta antzeko ezein reality edo talent show-tan azaldu beharrik izan; aski izan zitzaion ETBko 'Izar gazte bila' saioko galetan parte hartzea. Han, bere benetako bokazioari neurria hartu eta karrera ezin oparoagoaren lehenengo pausoak eman zituen. Horren emaitza dugu momentuz 'Badakit', nagusiki pianoaren akonpainamendu soilaz grabatu duen ahots-jazzeko albuma.
Kantariak boleroarekin jolasten du 'Un poco más' kantuan eta teklatua-ahotsa delako binomioa hausten du 'Throw it away' delakoan, saxoari eta kontrabaxuari leku eginez. Oreka TXen txalaparta ere ageri da diskoari izena ematen dion euskarazko kantuan, jazzaren hizkuntza eta euskal musikaren tradizioa uztartu nahian. 'The lady is a tramp' eta 'Angel eyes' bezalako klasikoek osatzen dute artista honen estreinako lana.