• Argentina-Mexiko-Espainia.
• Zuzendaritza: Laura Casabé.
• Ekoizpena: Alejandro Israel, Valeria Bistagnino, Tomás Eloy Muñoz Lázaro, Diego Martínez Ulanosky, Ángeles Hernández, David Matamoros, Livi Herrera / Ajimolido Films, Mostra Cine, Caponeto Films, Mr. Miyagi Films.
• Gidoia: Benjamín Naishtat.
• Argazkia: Diego Tenorio.
• Musika: Pedro Onetto, Fabián Aranda.
• Muntaketa: Miguel Schverdfinger, Ana Remón.
• Aktoreak: Dolores Oliverio, Fernanda Echevarría, Luisa Merelas, Isabel Bracamonte, Candela Flores, Agustín Sosa, Dady Brieva.

Laura Casabé, Buenos Airesen eta New Yorken hezitako zuzendari, gidoilari eta kamarografoak, Kusturicaren ikasleak, Lynch eta Carrieren (1976) miresleak, Mariana Enriquezen bi kontakizun moldatzen ditu hemen. Mariana Enriquez Argentinako erreginetako bat da tentsio handiko testuinguru sozial, politiko eta bizitzakoetan oinarritutako izuaren narratiban. Laurak bere proposamenean El carrito eta La Virgen de la tosquera ipuin ilunak batzen ditu. Neska batzuk. Nerabezaroa zertxobait gaindituta. Desira zirtaka. Aintzira bat, lurralde abandonatuan, non bainu hartu. Jaberik gabeko txakurrak, baina nori zerbitzatu badakitenak. Beroa. Sexua. Sorginkeria. Odola lapiko batean, maitasun-lokailu hautsezinak sortzeko. Erosketako orgatxo abandonatu bat, behera datorren urbanizazio baten erdian. Kobazulo batean, irudi bat... Baina benetan Birjina bat da? Tosquerako Ama Birjinaren irudia da?