Arte eszenikoen alorrean magia gehien duen generoetako bat izan arren, zoritxarrez sarritan ez zaio merezi duen garrantzia eman. Agian horregatik (baina ez horregatik soilik) da bereziki garrantzitsua Topaklown bezalako ziklo bat, pailazogaiei nazioarteko clown handienetako batzuengandik ikasteko aukera ematen dielako, aldi berean guztiek bere artea gero eta fidelagoa den publikoari erakusten dioten bitartean.
Topaklownek bosgarren edizio beteko du aurten, hainbat lekutatik etorritako konpainia eta clownez osatutako kartel apartarekin. Haiengandik ikasiko dute aurten izena emandako 160en bat ikaslek; kopuru hori, hain zuzen ere, gehituz joan da urtetik urtera, lehenengo edizioan 64 izan ziren eta. Ikusle moduan gozatu nahi dutenek ere izango dute horretarako aukera, San Agustin Kultugunean eta Musika Eskolako parkean (eguraldiak laguntzen badu) antolatutako egitarau interesgarriari esker.
Umorea eta zirrara erabiliz, gizakion barne-grinak erakusten dituen generoaz gozatzeko aukera aparta.