Harkaitz Canok eta Ximun Fuchsek sinatutako Nor naizen baneki antzezlana taularatuko dute Arriaga Antzokian azaroaren 5ean eta 6an, eta agertokia galderen aztarnategi bilakatuko da. Axut! eta Artedrama, euskarazko antzerkiaren erreferenteak, identitatearen indusketa sinbolikoa  proposatzen dute hemen: nortzuk izan ginen, nortzuk garen eta gure atzean zein aztarna uzten dugun.

Fuchsek berak zuzendu eta Ramon Agirre, Garoa Bugallo, Maialen Diaz, Aline Etxeberri, Manex Fuchs, Idoia Tapia eta Oier Zuñigak antzeztuta, antzerki arkeologian barneratzen da antzezlana, non iraganak oraina argitzen duen. Irulegiren Eskuaren —euskararen lehen lekukotasun idatziaren— aurkikuntzan inspiraturik, objektu hori memoria kolektibo eta pertsonalari buruzko gogoeta baten hastapen bihurtzen du obrak.

Estetikoki, Nor naizen baneki -ek hizkuntza eszeniko berriak esploratzen ditu: bideo proiekzioak, laser proiekzioak eta mugimenduan dauden gorputzak mosaiko sentsoriala osatzen dute, non kantua, dantza eta hitza indusketa beraren estratu gisa nahasten diren.

Xabier Erkiziaren musikarekin eta Bernues anaien argi diseinuarekin, Canok eta Fuchsek aurkikuntzaren poetika bat eraikitzen dute. Antzerkia, esaten digutenez, ez dago arkeologiatik hain urruti: ikusezina dena erreskatatzen saiatzen dira biak, oraindik ere azalaren azpian taupaka dagoena lurpetik ateratzen.