Zenbaitek uste dute Leonor Watling 2003an hasi zela kantatzen, orduko bere mutilagun Alejandro Pelayo pianistarekin batera Marlangon sartu zenean. Baina egia osoa esatekotan, aurretiaz ere, antzezle honek ahotsa utzi zien soul eta jazzeko Madrilgo beste talde batzuei, Federico Chueca eta San Jorge abesbatzei eta Madrilgo Eliza Anglikarreko gospel-koruari. Hauekin ez zuen Urrezko Diskoa lortu, baina bai Marlangoren lehenengo bi lanekin, taldearen izena zeramanarekin eta 'Automatic imperfection' delakoarekin.
Halakoxe harrera beroa egin zioten pop, rock, kabaret eta soinu banden zatiez osatutako errepertorioari, askotan Leonorrek horrenbeste miresten duen Tom Waits-en moduko artisten ekoizpenarekin lotzen duen gau eta jazz giroan bilduta. Taldeak seigarren diskoa prestatzen dihardu, udaberrian argitaratzeko asmoz, eta ordurarte, 'Un día extraordinario' dugu bere azken lana, erdaraz egindako estreinaldi sentitua, sosegatua eta ausarta.